Downlaod der Statuten als PDF

art. 1 Num e domicil
Cul num Uniun Open Air Trun (UOAT) seformescha in’uniun el senn digl artechel 60 e suandonts dil cudisch civil svizzer da cuoz nundeterminau che ha siu domicil a Trun.

art. 2 Intent
Ils intents dall’Uniun Open Air Trun:

• organisar annualmein igl Open Air Trun

art. 3 Commembers

Commembers activs san tuttas persunas naturalas daventar che han cumpleniu il 16avel di da naschientscha, han terminau il temps da scola obligatori ed han interess vid igl Open Air Trun. Il commember activ ha il dretg da vuschar ed ei obligaus da luvrar pigl Open Air Trun.

Commembers passivs san tuttas persunas naturalas e giuridicas daventar che sustegnan l’uniun finanzialmein. Il commember passiv ha buca il dretg da vuschar.

Mintga commember che paga dus onns in suenter l’auter buc la contribuziun annuala vegn exclaus dall’uniun a caschun dalla proxima radunonza generala.

art. 4 Recepziun

Ils commembers activs san vegnir recepi da tut temps. Els valan sco recepi aschigleiti ch’els han adempliu las obligaziuns finanzialas.

Ils commembers passivs san vegnir recepi da tut temps. Els valan sco recepi aschigleiti ch’els han adempliu las obligaziuns finanzialas.

art. 5 Dretgs ed obligaziuns

Mintga commember activ gauda tut ils avantatgs dall’uniun. Plinavon ha el il dretg da votar, da far propostas ed iniziativas.

Mintga commember passiv ei envidaus alla radunonza generala, ha denton buca il dretg da votar.

La recepziun oblighescha il commember activ e passiv da renconuscher las statutas sco era tuttas decisiuns pridas legalmein entras l’Uniun Open Air Trun ni la suprastonza.

Mintga commember activ ei obligaus da collaborar a caschun da tuttas occurrenzas organisadas dall’Uniun Open Air Trun.

Mintga commember che vegn elegius per in uffeci ei obligaus da surprender quel per ina perioda da dus onns.

art. 6 Abdicaziun

Mintga commember sa abdicar tochen in meins avon la radunonza generala. La brev che cuntegn ils motivs per l’abdicaziun sto el tarmetter al president. Lez prelegia la brev a caschun dalla radunonza generala.

art. 7 Organisaziun

Ils organs dall’Uniun Open Air Trun ein:

• la radunonza generala
• la suprastonza
• il comite d’organisaziun (4 persunas che sustegnan e segidan culla suprastonza)
• dus revisurs da quen

art. 8 La radunonza generala

La radunonza generala ei en tuts graus il suprem organ dall’UOAT e vegn tenida ina gada ad onn la sonda che ei il pli datier dils 15 d’october. Ella ei obligatoria per tut ils commembers activs.

Las tractandas statutaricas dalla radunonza generala ein:

• avertura ed appel
• approbaziun dalla gliesta da tractandas
• approbaziun dil protocol
• rapport dil president
• rendaquen, rapport dils revisurs da quen ed approbaziun dil quen
• fixaziun dalla contribuziun annuala per commembers activs e passivs
• mutaziuns, entradas ed extradas
• elecziuns
• varia

art. 9 Radunonzas extraordinarias

Ulteriuras radunonzas extraordinarias san vegnir convocadas sin conclus dalla suprastonza ni sin giavisch a scret da silmeins 1/3 dils commembers activs.

art. 10 Modus da votar

Per ch’ina radunonza generala possi prender conclus ston silmeins 1/5 dils commembers activs esser presents. Tier tuttas decisiuns ed elecziuns vala il maun pli.

art. 11 Suprastonza

La suprastonza vegn elegida dalla radunonza generala per ina perioda da dus onns. Ella vegn formada dil president, actuar e cassier. Enteifer sias cumpetenzas ei la suprastonza libra en siu agir, sto denton dar plaid e fatg a caschun dalla radunonza generala. La suprastonza prepara e convochescha las radunonzas. Ella realisescha igl Open Air Trun annualmein.

art. 12 President

Il president representa l’Uniun Open Air Trun. El presidiescha las radunonzas e procura per la realisaziun digl open air. Plinavon presidiescha el il comite d’organisaziun.

art. 13 Actuar

Igl actuar scriva tut ils protocols. Plinavon ha el quitau digl archiv dall’Uniun Open Air Trun.

art. 14 Cassier

Il cassier administrescha la cassa dall’UOAT e renda annualmein quen a caschun dalla radunonza generala. Serrada dil quen annual ei mintgamai ils 30 da settember. Sin giavisch dall’Uniun da giuventetgna Trun presenta el il quen digl open air a caschun dalla radunonza generala dall’Uniun da giuventetgna Trun.

art. 15 Comite d’organisaziun

Il comite d’organisaziun vegn elegius dalla radunonza generala per ina perioda da dus onns e consista da quater commembers ed il president dall’Uniun Open Air Trun ch’ei medemamein il president dil comite d’organisaziun. Il comite d’organisaziun ha d’exequir acziuns surdadas ad el entras la suprastonza dall’UOAT e da far propostas a quella per ulteriurs arranschaments en favur digl open air (discos e fiastas da tut gener ein exclausas)

Plinavon vegn menau protocol sur da tut las sedutas tenidas.

art. 16 Ils revisurs da quen

Ils revisurs da quen vegnan elegi dalla radunonza generala per ina perioda da dus onns. Els controlleschan il quen dall’Uniun Open Air Trun e rapporteschan a caschun dalla radunonza generala surdlunder.

art. 17 Il responsabel pil material

Responsabels per il material ei ina persuna dil comite d’organisaziun. Ella ei obligada dad haver quitau da tut igl uorden dall’UOAT. Il responsabel pil material vegn elegius da radunonza generala per ina perioda da dus onns.

art. 18 Open Air Trun

L’Uniun Open Air Trun realisescha annualmein igl Open Air Trun. Quel ha liug la davosa sonda da zercladur ni la tiarza sonda da fenadur.

art. 19 Finanzas

Las finanzas dall’Uniun Open Air Trun secumponan da:

• taxa annuala che vegn fixada mintgamai a caschun dalla radunonza generala (max. CHF 200.-)
• regals e donaziuns da tiarzas persunas
• recavs digl Open Air Trun
• recavs dad ulteriurs arranschaments

art. 20 Uniun da giuventetgna Trun

Recav:

• tier in recav digl Open Air Trun sur CHF 10‘000 ha l’UOAT da dar giu 25% dil recav all’Uniun da giuventetgna Trun
• tier in recav sut CHF 10‘000 ha l’UOAT da dar giu 20% dil recav all’Uniun da giuventetgna Trun
• enstagl dallas duas pusseivladads sura numnadas (20% ni 25% dil recav) ha l’Uniun da giuventetgna Trun la pusseivladad da surprender in post (priu ora la bar) a caschun digl Open Air Trun, da lur recav astga l’Uniun da giuventetgna Trun salvar 80%

Material:

L’Uniun da giuventetgna Trun metta a disposiziun tut il material existent pigl open air all’UOAT senza indemnisaziun. Sch‘il material va empaglia, sche sto quel vegnir remplazzaus. L’Uniun da giuventetgna Trun sa disponer da tut il material, priu ora il di dad open air.

L’Uniun da giuventetgna Trun ha il dretg sin in post enteifer il comite d’organisaziun dall’UOAT.

Scadin artechel che pertucca l’Uniun da giuventetgna Trun sa vegnir midaus sil pli baul 5 onns suenter l’approbaziun da questas statutas.

art. 27 Responsabladad

Per las obligaziuns finanzialas garantescha sulettamein la facultad dall’uniun. Ina responsabladad dils commembers ei exclausa, ultra dallas contribuziuns da commember.

art. 28 Revisiun dils statuts

Ina revisiun dils statuts ei mo pusseivla tier la radunonza generala.

art. 29 Dissoluziun dall’Uniun Open Air Trun

Sche l’Uniun Open Air Trun sedissolva enzacu, sche va sia facultad all’Uniun da giuventetgna Trun.

art. 30 Disposiziun executorica

Quests statuts ein vegni redigi formalmein per persunas masculinas. Tuttas determinaziuns valan denton conform al senn era per persunas femininas.

art. 31 Disposiziun transitoria

Quests statuts ein vegni approbai dalla radunonza generala ordinaria dils 04 da fevrer 2011 ed entran en vigur cun quei datum.